İstifadə Qaydaları
1. Ümumi müddəalar 1.1. “Elektron iştirakçılıq” portalından (bundan sonra “Elektron iştirakçılıq” və ya portal) istifadə etməzdən öncə bu “İstifadə Qaydaları” və “Məxfilik Bəyannaməsi” (sənədlərin linki əlavə olunacaq) ilə tanış olmağınız tövsiyə olunur. Portaldan istifadə etməklə “İstifadə Qaydaları” və “Məxfilik Bəyannaməsi”nə razılıq vermiş olursunuz.
1.2. Portal dövlət və cəmiyyət həyatının müxtəlif məsələlərinin həllində vətəndaşların və vətəndaş cəmiyyəti institutlarının iştirakını təmin edən Elektron Hökümət İnformasiya Sisteminin (bundan sonra - EHİS) altsistemi olan rəqəmsal platformadır.
1.3. Portalın sahibi funksiyalarını Azərbaycan Respublikası Rəqəmsal İnkişaf və Nəqliyyat Nazirliyi (bundan sonra – Nazirlik), operatoru isə Azərbaycan Respublikası Rəqəmsal İnkişaf və Nəqliyyat Nazirliyi tabeliyində İnnovasiya və Rəqəmsal İnkişaf Agentliyidir (bundan sonra – Agentlik) (biz, bizə, bizim dedikdə Agentlik nəzərdə tutulur).
1.4. Bu Şərtlər Azərbaycan Respublikasının qanunvericiliyinə, o cümlədən aşağıdakı normativ hüquqi aktlara uyğun tətbiq olunur:
• “İctimai iştirakçılıq haqqında” Azərbaycan Respublikasının Qanunu;
• Azərbaycan Respublikası vətəndaşlarının qanunvericilik təşəbbüsü hüququndan istifadə etməsi qaydası haqqında” Azərbaycan Respublikasının Qanunu;
• Azərbaycan Respublikası Prezidentinin 2025-ci il 12 avqust tarixli 472 nömrəli Fərmanı ilə təsdiq edilmiş “Elektron Hökumət İnformasiya Sistemi haqqında Əsasnamə”;
• Bu sahəni tənzimləyən digər normativ hüquqi aktlar.
1.5. İstifadəçi tərəfindən aşağıdakılardan hər hansı biri həyata keçirildikdə bu Şərtlər qəbul edilmiş sayılır:
• Portal üzərindən elektron kabinetin yaradılması;
• Portal vasitəsilə təqdim olunan xidmətlərdən istifadəyə başlanılması;
• Portal üzərindən elektron kabinetə giriş edilməsi;
1.6. Bu İstifadə Qaydaları Portaldan istifadə qaydasını, Portalın funksional imkanlarından istifadəyə dair şərtləri müəyyənləşdirir.
2. Anlayışlar 2.1. Elektron iştirakçılıq - İctimai iştirakçılıq formalarının elektron formada təşkili;
2.2. Elektron Hökümət İnformasiya Sistemi (bundan sonra – EHİS) - rəqəmsal texnologiyalardan, o cümlədən informasiya-kommunikasiya texnologiyalarından istifadə yolu ilə mərkəzi və yerli icra hakimiyyəti orqanlarının, dövlət mülkiyyətində olan və paylarının (səhmlərinin) nəzarət zərfi dövlətə məxsus olan hüquqi şəxslərin, dövlət adından yaradılan publik hüquqi şəxslərin və digər büdcə təşkilatlarının, həmçinin bələdiyyələrin fəaliyyətinin, onların bir-biri ilə və digər fiziki və hüquqi şəxslərlə əlaqələrinin operativliyini, səmərəliliyini və şəffaflığını, habelə elektron xidmətlərin “bir pəncərə prinsipi” əsasında göstərilməsini, səmərəli və operativ sənəd (məlumat) mübadiləsini, açıq informasiyaya çıxış və vətəndaşların qanunvericilik təşəbbüsü hüququnun və dövlət idarəetməsində ictimai iştirakçılığın həyata keçirilməsi imkanlarını, eləcə də elektron xidmətlərin, EHİS-də saxlanılan məlumatların sistemliliyini və əlçatanlığını təmin edən dövlət informasiya sistemi;
2.3. Vahid Giriş Sistemi (bundan sonra – Sistem və ya “mygov ID”) - EHİS-in altsistemi olan, istifadəçilərin dövlət və digər inteqrasiya olunmuş informasiya sistemləri və ehtiyatlarına təkmil sertifikatlı gücləndirilmiş elektron imza və digər elektron eyniləşdirmə vasitələri ilə vahid formada identikləşdirilməsini və birdəfəlik girişini təmin edən informasiya sistemi;
2.4. “mygov” - dövlət və ya özəl qurumların elektron xidmətlərinin göstərilməsi, habelə bütün növ dövlət xidmətləri və vətəndaş müraciətləri nəticəsində təqdim edilən sənədlərin (məlumatların) mərkəzləşdirilmiş qaydada təqdim olunması və onlardan istifadə, vətəndaş müraciətlərinin və informasiya sorğularının mərkəzləşdirilmiş qaydada təqdim edilməsi və cavablandırılması, müraciətlərin icra statusunun izlənilməsi, eləcə də şəxslərin icraatla bağlı, o cümlədən onlara göstərilən xidmətlərdə, onlara dair məlumatlarda (sənədlərdə) baş verən dəyişikliklər (yeniliklər) barədə məlumatlandırılması, habelə fərdi məlumatlarının sorğulanmasına dair razılığın verilməsi və idarə olunmasının təmin edən xidmət kanalı;
2.5. Elektron kabinet/Hesab – Portal üzrə xidmətlərdən istifadə etmək məqsədilə yaradılan, fərdi identifikasiya nömrəsi (FİN) ilə əlaqələndirilmiş, İstifadəçinin portal daxilində fəaliyyətini əks etdirən elektron kabinet;
2.6. Giriş məlumatları - İstifadəçinin autentifikasiyası üçün istifadə olunan identifikatorlar və autentifikasiya vasitələri (parol/PIN, OTP, token, sertifikat, biometrik məlumatlar və s.);
2.7. İstifadəçi – “mygov ID” vasitəsilə Portala daxil olan və onun funksionallıqlarından isifadə edən Azərbaycan Respublikasının vətəndaşları, hüquqi şəxslər, vətəndaş cəmiyyəti institutlarının nümayəndələri, habelə qanunvericiliklə nəzərdə tutulmuş hallarda digər şəxslər.
3. İstifadə şərtləri 3.1. “Elektron iştirakçılıq” portalından yalnız qanunvericiliklə və bu İstifadə Qaydaları ilə müəyyən edilmiş məqsədlər üçün istifadə edə bilərsiniz.
3.2. Birbaşa və ya dolayı yolla aşağıdakı fəaliyyətlər qadağandır:
3.2.1. Portal üzərindən təqdim olunan xidmətlər (o cümlədən autentifikasiya və şifrənin yeniləməsi) üzərində modifikasiya, əks-mühəndislik, dekompilyasiya etmək və ya digər qanunazidd müdaxilələr etmək;
3.2.2. Üçüncü şəxslərin Portalda elektron kabinetinizdən istifadə etməsinə icazə vermək;
3.2.3. Portala məxsus olan və onun funksionallığını təmin edən hər hansı elementi, o cümlədən proqram təminatını çoxaltmaq və ya surətlərini yaratmaq;
3.2.4. Agentlik tərəfindən Portalda çıxış imkanı və ya istifadəsi məhdudlaşdırılmış hər hansı əməliyyatı və ya funksionallığı aradan qaldırmaq, aşmaq, dəyişdirmək və digər müdaxilələr etmək;
3.2.5. Hüquqi əsasınız olmadan sizə məxsus olmayan elektron kabinetə çıxış imkanı əldə etmək, daxil olmaq və ya istifadə etmək;
3.2.6. Portal ilə bağlı böhtan və ya çaşdırıcı xarakterli məlumatlar yaymaq;
3.2.7. Portaldan qanunvericiliyə və bu İstifadə Qaydalarına zidd olan fəaliyyətin və ya məqsədlərin həyata keçirilməsi üçün istifadə etmək;
3.2.8. Portalın fəaliyyətini məhdudlaşdıran, dayandıran və ya funksionallığını poza bilən hər hansı müdaxilə etmək;
3.2.9. Portal üzərindən müvafiq qanunvericiliklə yayılması qadağan edilmiş məlumatları yükləmək, ötürmək və ya yaymaq;
3.2.10. Portal üzərindən sizin istifadəniz üçün nəzərdə tutulmamış məlumata çıxış etmək;
3.2.11. Portaldan istifadə etmək məqsədilə başqa fiziki və ya hüquqi şəxslərdən şifrə və ya fərdi məlumat istəmək.
3.3. “Elektron iştirakçılıq” portalının xidmətlərindən istifadə edərkən, İstifadəçilər etik qaydalara riayət etməlidirlər. Aşağıdakılarla məhdudlaşmayaraq – yalan məlumat yaymaq, nifrət nitqi, ayrı-seçkilik, böhtan, təhdid, zorakılığa çağırış, təhqiredici və nalayiq ifadələr, reklam xarakterli paylaşımlar, zarafatlar, konkret şəxslərin cinayət törətməkdə və ya oxşar əməllərdə ittiham edilməsi kimi etik qaydaların pozulması halında aşağıdakı tədbirlər görüləcəkdir:
• İlk iki pozuntu halında istifadəçiyə xəbərdarlıq edilir.
• Üçüncü pozuntu halında istifadəçi 90 gün müddətinə bloklanır.
• İlk bloklanmadan sonra oxşar qayda pozuntuları yenidən baş verərsə, ilk halda xəbərdarlıq edilir, ikinci pozuntu baş verdikdə isə istifadəçi 180 gün müddətinə bloklanır.
Qanunvericiliyin pozulması əlamətləri müəyyən edildiyi hallarda müvafiq hüquq-mühafizə orqanlarına müraciət edilir.
4. Portala giriş və hesabın idarə olunması 4.1. Portalın funksionallıqlarından və xidmətlərindən istifadə etmək üçün “Elektron iştirakçılıq” veb-saytından (əlavə olunur) elektron kabinetə giriş etməlisiniz.
4.2. Giriş Vahid Giriş Sistemi üzərindən baş tutur və Vahid Giriş Sistemi istifadəçilərin təkmil sertifikatlı gücləndirilmiş elektron imza və digər elektron eyniləşdirmə vasitələri ilə (bundan sonra Giriş Məlumatları) vahid formada identikləşdirilməsini, habelə qeyd olunan sistemə birdəfəlik girişi təmin edir.
4.3. Siz “Elektron iştirakçılıq” hesabınızın və Giriş Məlumatlarınızın konfidensiallığına, təhlükəsizliyinə və qorunmasına görə cavabdehsiniz.
4.4. Portaldan istifadə edərkən cihazınızın təhlükəsizliyini təmin etməli, o cümlədən brauzer kukilərini təmizləməli, məlumatlarınızın başqa bir şəxs tərəfindən istifadəsinə yol verməməlisiniz.
4.5. Giriş Məlumatlarınızın və ya hesabınızın məxfiliyi pozulubsa və ya icazəniz olmadan hesaba giriş edilibsə, bunu Agentliyə dərhal bildirməlisiniz.
4.6. Agentlik hesabın təhlükəsiz istifadəsinin təmin edilməsi məqsədilə ağlabatan texniki və təşkilati tədbirlər görür. İstifadəçi Giriş Məlumatlarının məxfiliyinin qorunmasına görə məsuliyyət daşıyır. İstifadəçinin Giriş Məlumatlarını üçüncü şəxslərə açıqlaması və ya lazımi qaydada qorumaması nəticəsində yaranmış icazəsiz istifadəyə görə Agentlik məsuliyyət daşımır. Bu müddəa Agentliyin qanunvericiliklə müəyyən edilmiş öhdəliklərini və Agentliyin təqsiri ilə bağlı məsuliyyətini istisna etmir.
4.7. Siz “Elektron iştirakçılıq” hesabınızın şifrəsinin itirilməsi, yayılması və ya başqaları tərəfindən icazəsiz istifadəsinin qarşısını almaq üçün lazımi diqqət göstərməlisiniz. Başqa bir şəxs “Elektron iştirakçılıq” hesabınız açıq olan cihazı və dolayısı ilə sizin haqqınızda məlumatı əldə edərsə, o cümlədən elektron xidmətlərdən istifadə və ya hesabınızla bağlı digər əməliyyatlar həyata keçirərsə, Agentlik sizə dəymiş zərər və ya ziyana görə məsuliyyət daşımır.
5. “Elektron iştirakçılıq” portalı xidmətləri 5.1. “Elektron iştirakçılıq” portalı sizin üçün dövlət və yerli əhəmiyyətli məsələlərin müzakirəsində iştirak etməsinə və rəy bildirməsinə imkan yaradır. Portal ictimai iştirakçılıq formaları olan ictimai şuralar, ictimai müzakirələr, ictimai dinləmələr, hüquqi akt layihələrinin ictimai müzakirəsi və yazılı məsləhətləşmələr, həmçinin kollektiv vətəndaş müraciətləri altbölmələrindən ibarətdir.
5.1.1. İctimai şuralar
5.1.1.1. İstifadəçi “İctimai şuralar” bölməsi vasitəsilə mərkəzi və yerli icra hakimiyyəti orqanlarının, eləcə də yerli özünüidarəetmə orqanlarının yanında yaradılan ictimai şuralara dair məlumatlarla tanış ola bilər.
5.1.1.2. İstifadəçi bu bölmə vasitəsilə ictimai şuralara irəli sürülmüş namizədlər, seçkilərin keçirilmə yeri və vaxtı, seçkilərlə bağlı digər məlumatlar və seçki nəticələri barədə məlumat əldə edə bilər.
5.1.2. İctimai müzakirələr
5.1.2.1. İstifadəçi bu bölmə vasitəsilə ictimai və yerli əhəmiyyətli məsələlər üzrə keçirilməsi nəzərdə tutulan ictimai müzakirələr barədə məlumat əldə edə bilər.
5.1.2.2. İstifadəçi ictimai müzakirələrdə iştirak etmək üçün Portal vasitəsilə qeydiyyatdan keçə bilər.
5.1.2.3. İctimai müzakirələrin nəticələri, o cümlədən qanunvericiliklə nəzərdə tutulmuş yekun sənədlər Portalda dərc edilir və istifadəçi həmin nəticələrlə elektron kabinet və ya portal vasitəsilə tanış ola bilər.
5.1.3. İctimai dinləmələr
5.1.3.1. İstifadəçi “İctimai dinləmələr” bölməsi vasitəsilə hüquqi akt layihələri və digər məsələlərlə bağlı keçirilməsi nəzərdə tutulan ictimai dinləmələr barədə məlumat əldə edə bilər.
5.1.3.2. İstifadəçi ictimai dinləmələrdə iştirak etmək üçün Portal vasitəsilə qeydiyyatdan keçə bilər.
5.1.3.3. İctimai müzakirələrin nəticələri, o cümlədən qanunvericiliklə nəzərdə tutulmuş yekun sənədlər Portalda dərc edilir və istifadəçi həmin nəticələrlə elektron kabinet və ya portal vasitəsilə tanış ola bilər.
5.1.4. Hüquqi akt layihələrinin ictimai müzakirəsi
5.1.4.1. İstifadəçi bu bölmə vasitəsilə qanun və digər hüquqi akt layihələrinə dair ictimai müzakirə və dinləmələr barədə məlumatlar (layihəni təqdim edən subyekt, layihənin qeydiyyat nömrəsi, göndərildiyi komitə (komitələr), ictimai dinləmələrin qrafiki və keçiriləcəyi yer və ictimai müzakirənin müddəti, keçirilməsi qaydaları, rəy, irad və təkliflərin təqdim olunması qaydası, onlara baxılması və nəticələrin açıqlanacağı müddətlər barədə məlumat) ilə tanış ola bilər.
5.1.4.2. İstifadəçi Portal vasitəsilə qeydiyyatdan keçməklə hüquqi aktlara dair ictimai müzakirə və ya dinləmələrdə iştirak edə bilər.
5.1.4.3. İstifadəçi qanun layihələrinə dair təqdim olunmuş rəy, irad və təkliflərin nəzərə alınmasının nəticələri barədə məlumatları elektron kabinet və ya Portal vasitəsilə əldə edə bilər.
5.1.5. Yazılı məsləhətləşmələr
5.1.5.1. İstifadəçi “Yazılı məsləhətləşmələr” bölməsi vasitəsilə hüquqi akt layihələri, eləcə də ictimai və yerli əhəmiyyətli müxtəlif məsələlər üzrə keçirilən yazılı məsləhətləşmələr barədə məlumat əldə edə bilər.
5.1.5.2. İstifadəçi hüquqi akt layihələri və ya ictimai və yerli əhəmiyyətli müxtəlif məsələlər üzrə öz yazılı rəy və təkliflərini bu bölmə vasitəsilə təqdim edə bilər.
5.1.6. Kollektiv vətəndaş müraciətləri altbölməsi
5.1.6.1. “Kollektiv vətəndaş müraciətləri” altbölməsi vasitəsilə İstifadəçi üçün dövlət orqanlarına (qurumlarına) və digər subyektlərə kollektiv müraciət yaradılması imkanı təqdim olunur.
5.1.6.2. Kollektiv müraciət yaratmaq üçün İstifadəçi “mygov” şəxsi kabinetinə yönləndirilir. Müraciəti yaradan İstifadəçi müraciətin mətnini daxil etdikdən sonra müraciətə qoşulması nəzərdə tutulan şəxslərin ad, soyad və mobil nömrə məlumatlarını müvafiq bölmələrə daxil edir.
5.1.6.3. Ad, soyad və mobil nömrə məlumatları daxil edilmiş şəxslərin “mygov” şəxsi kabinetlərinə müraciətə qoşulmaları üçün bildiriş göndərilir.
5.1.6.4. Bildiriş göndərilmiş şəxslər müraciətin mətnini nəzərdən keçirdikdən sonra elektron imza vasitəsilə müraciəti təsdiq edərək müraciətə qoşula və ya imtina edə bilərlər.
5.1.6.5. Kollektiv müraciətin dövlət orqanına (qurumuna) və ya digər subyektə göndərilməsi müraciətə daxil edilmiş şəxslərdən müraciəti elektron qaydada təsdiqləməsindən sonra həyata keçirilir.
5.1.6.6. Kollektiv vətəndaş müraciətinin göndərilməsi üçün müraciəti yaradan şəxsdən əlavə ən azı bir digər şəxsin müraciəti təsdiq etməsi tələb olunur.
5.1.6.7. Kollektiv vətəndaş müraciətinə verilən cavab vətəndaşın seçimindən asılı olaraq elektron poçt, poçt ünvanı və ya “mygov” şəxsi kabineti vasitəsilə təqdim edilir və cavab məktubu müraciəti yaradan şəxsə göndərilir.
5.2. İstifadəçi elektron kabinetdə keçmiş əməliyyatları (verilmiş səs, sorğularda iştirak və s.) izləyə bilər.
6. İstifadəçinin hüquqları 6.1. İstifadəçi Portal çərçivəsində aşağıdakı hüquqlara malikdir:
6.1.1. Portal vasitəsilə qanunvericiliklə nəzərdə tutulmuş qaydada ictimai iştirakçılıqda iştirak etmək;
6.1.2. İctimai iştirakçılığın formaları barədə məlumat əldə etmək;
6.1.3. Portalda elektron kabinetinə daxil olmaq, həyata keçirdiyi əməliyyatlar barədə məlumat əldə etmək;
6.1.4. Emal olunan fərdi məlumatlara çıxış əldə etmək;
6.1.5. Fərdi məlumatlarının işlənilməsi barədə qanunvericiliklə müəyyən edilmiş hüquqlardan istifadə etmək;
6.1.6. Sistem üzrə təhlükəsizlik hadisələri barədə məlumatlandırılmaq;
6.1.7. Hesabın ləğv edilməsini tələb etmək;
6.1.8. Portalın fəaliyyəti ilə bağlı şikayət və təklif təqdim etmək.
7. “Elektron iştirakçılıq” hesabının ləğv edilməsi 7.1. İstifadəçi vəfat etdikdə, qanunvericiliyə əsasən mülki hüquq qabiliyyəti sona çatdıqda onun Portal üzrə elektron kabinetinin istifadəsi dayandırılır.
7.2. İstifadəçi barədə elektron kabinet üzrə fərdi məlumatların saxlanılması və arxivləşdirilməsi qanunvericiliklə müəyyən edilmiş qaydada həyata keçirilir.
8. Üçüncü tərəflərin qaydaları 8.1. Siz Portalda hesab yaratmaq üçün Vahid Giriş Sistemindən istifadə etməklə Vahid Giriş Sisteminin Məxfilik Bəyannaməsi və Şərtlər və Qaydalarını da qəbul edirsiniz.
8.2. Portaldan istifadə üçüncü tərəflərin sistem və ya xidmətlərindən istifadə halını istisna etmir və həmin sistem və ya xidmətlərin şərtlər və qaydalarına əməl olunmamasına görə Agentlik məsuliyyət daşımır.
9. Agentliyin diskresion səlahiyyətləri 9.1. Agentlik İstifadə Qaydalarını dəyişdirə və ya əlavələr edə bilər. Agentlik yenilənmiş İstifadə Qaydalarını Portalın veb-saytında və ya digər əlaqə vasitələri ilə kommunikasiya edərək istifadəçini məlumatlandıra bilər. İstifadə Qaydaları yenilədikdən və bununla bağlı müvafiq kommunikasiya həyata keçirildikdən sonra Portaldan istifadə etməyə davam etməklə yenilənmiş İstifadə Qaydalarını qəbul etmiş olursunuz. Əgər yenilənmiş İstifadə Qaydalarının şərtləri ilə razı deyilsinizsə, Portaldan istifadəni dayandıracağınızı qəbul edirsiniz.
9.2. Agentlik portalın veb-saytında təkmilləşdirmələrlə bağlı olaraq, öncədən bildiriş vermədən məhdudiyyətlər gətirə bilər.
9.3. Agentlik qanunvericilikdə və bu İstifadə Qaydalarında nəzərdə tutulmuş hallarda, habelə Portalın təhlükəsizliyinin və fasiləsiz fəaliyyətinin təmin edilməsi məqsədilə zəruri və mütənasib tədbirlər görmək, o cümlədən istifadəçinin kabinetini ləğv etmək hüququna malikdir. Bu, aşağıdakı hallarda baş verə bilər:
9.3.1. Elektron kabinetinizi bağlamaq üçün Agentliyə müraciət etsəniz;
9.3.2. Məhkəmə, hüquq-mühafizə və ya digər dövlət orqanlarının tələbi olduqda;
9.3.3. Hesabınız vasitəsilə şübhəli, qanunazidd və ya cinayətlə bağlı əməliyyatlar həyata keçirildikdə;
9.3.4. Bu İstifadə Qaydaları və ya qanunvericiliyin pozulması ilə bağlı şübhə olduqda.
10. Əqli mülkiyyət hüquqları 10.1. Agentlik Portal, o cümlədən müvafiq proqram təminatına və dizaynı, interfeysi, loqosu, əmtəə nişanları və digər texniki və funksional elementləri üzərində bütün hüquqlara, o cümlədən qanunvericiliklə qorunan əqli mülkiyyət hüquqlarına sahibdir.
10.2. Siz Agentliyin həmin hüquq və maraqlarına birbaşa və ya dolayısıyla məhdudlaşdırmağa səbəb olacaq hər hansı bir hərəkəti etməyəcəyinizi və ya etməyə icazə verməyəcəyinizi qəbul edirsiniz.
10.3. Siz Agentliyin, o cümlədən “Elektron iştirakçılıq” ilə əlaqədar, müəlliflik hüquqlarını, əmtəə nişanlarını və ya digər əqli mülkiyyət hüquqlarını silməmək, gizlətməmək və ya dəyişdirməmək öhdəliyini daşıyırsınız.
10.4. Agentliyin yazılı icazəsi olmadan portala məxsus olan heç bir element çoxaldılmalı, surətləri yayılmamalı və ya təkrar istifadə edilməməlidir.
11. Məsuliyyət 11.1. Agentlik “Elektron iştirakçılıq” ilə bağlı olaraq təqdim etdiyi xidmətlərə görə, o cümlədən “Elektron iştirakçılıq” iştirakçılarının nöqsanlarına görə sizə və ya hər hansı bir üçüncü tərəfə, dəymiş zərər və ya ziyana görə heç bir halda məsuliyyət daşımır.
11.2. Siz Portaldan istifadə edərkən insan və ya kompüter xətaları, qeyri-dəqiqliklər, gecikmələr, mövcud olmama və itkilərin baş verməsini və Agentliyin bununla əlaqədar məsuliyyət daşımadığını qəbul edirsiniz.
12. Məxfilik Bəyannaməsi 12.1. Portaldan istifadə etdiyiniz müddət ərzində təqdim etdiyiniz fərdi məlumatlarınız və ya təqdim etdiyiniz başqa bir şəxsə aid olan fərdi məlumatlar toplanıla və işlənilə bilər. Bütün fərdi məlumatlar Məxfilik Bəyannaməsinə (sənədin linki) uyğun olaraq toplanılacaq və işləniləcəkdir.
13. Təkmilləşdirmələr 13.1. Agentlik “Elektron iştirakçılıq” üçün təkmilləşdirmələr və ya yeni versiyalarını təqdim edilə bilər. Bu təkmilləşdirmələr avtomatik və ya sizin tərəfinizdən quraşdırıla bilər.
14. Tətbiq edilən hüquq və mübahisələrin həlli qaydası 14.1. Bu İstifadə Qaydaları və Portaldan istifadə üzrə məsələlər Azərbaycan Respublikasının qanunvericiliyinə uyğun qaydada tənzimlənir və təfsir edilir.
14.2. Bu İstifadə Qaydalarından və Portaldan istifadədən irəli gələn və ya onunla əlaqədar yaranan bütün mübahisələr danışıqlar və qarşılıqlı razılaşma yolu ilə həll edilir.
14.3. Danışıqlar nəticəsiz qaldıqda bu İstifadə Qaydalarından və Portaldan istifadədən irəli gələn və ya onunla əlaqədar yaranan bütün mübahisələr, o cümlədən onun pozulması, tərtib edilməsi, qüvvədə olması, xitam verilməsi və təfsiri ilə bağlı mübahisələr Azərbaycan Respublikasının müvafiq məhkəmələrinə təqdim edilir və yekun olaraq həll edilir.
15. Yekun müddəalar 15.1. Agentlik sizə “Elektron iştirakçılıq” veb-saytında dərc etməklə, habelə sizə məxsus əlaqə məlumatları vasitəsilə və ya başqa yolla bildirişlər göndərilə bilər. Belə bildirişin Agentlik tərəfindən dərc edildiyi və ya göndərildiyi an həmin bildirişi aldığınız hesab olunur.
15.2. Şərtlərin müxtəlif dil versiyaları arasında uyğunsuzluq olduqda Azərbaycan dilində olan mətn üstün tutulur.
15.3. İstifadəçi bu Şərtlərdən istifadə etməklə onları oxuduğunu, anladığını və qəbul etdiyini təsdiq edir.
16. Əlaqə 16.1. “Elektron iştirakçılıq” portalı ilə bağlı müraciət, şikayət və sorğular aşağıdakı kanallar vasitəsilə qəbul edilir:
16.2. Dəstək kanalı: info@idda.az, (+99412) 310 14 00
Veb-sayt: https://e-ishtirak.gov.az/contact
Poçt ünvanı: Atatürk prospekti 89, Bakı, Azərbaycan / AZ1069